Vaikritikam Rahasyam
॥ అథ వైకృతికం
రహస్యమ్ ॥
ఋషిరువాచ
ఓం త్రిగుణా తామసీ
దేవీ సాత్త్వికీ యా
త్రిధోదితా।
సా శర్వా చణ్డికా
దుర్గా భద్రా భగవతీర్యతే॥1॥
యోగనిద్రా హరేరుక్తా మహాకాలీ తమోగుణా।
మధుకైటభనాశార్థం
యాం తుష్టావామ్బుజాసనః॥2॥
దశవక్త్రా దశభుజా దశపాదాఞ్జనప్రభా।
విశాలయా రాజమానా త్రింశల్లోచనమాలయా॥3॥
స్ఫురద్దశనదంష్ట్రా
సా భీమరూపాపి
భూమిప।
రూపసౌభాగ్యకాన్తీనాం
సా ప్రతిష్ఠా
మహాశ్రియః॥4॥
ఖడ్గబాణగదాశూలచక్రశఙ్ఖభుశుణ్డిభృత్।
పరిఘం కార్ముకం శీర్షం
నిశ్చ్యోతద్రుధిరం దధౌ॥5॥
ఏషా సా వైష్ణవీ
మాయా మహాకాలీ దురత్యయా।
ఆరాధితా వశీకుర్యాత్ పూజాకర్తుశ్చరాచరమ్॥6॥
సర్వదేవశరీరేభ్యో
యాఽఽవిర్భూతామితప్రభా।
త్రిగుణా సా మహాలక్ష్మీః
సాక్షాన్మహిషమర్దినీ॥7॥
శ్వేతాననా నీలభుజా సుశ్వేతస్తనమణ్డలా।
రక్తమధ్యా రక్తపాదా నీలజఙ్ఘోరురున్మదా॥8॥
సుచిత్రజఘనా చిత్రమాల్యామ్బరవిభూషణా।
చిత్రానులేపనా కాన్తిరూపసౌభాగ్యశాలినీ॥9॥
అష్టాదశభుజా పూజ్యా సా
సహస్రభుజా సతీ।
ఆయుధాన్యత్ర వక్ష్యన్తే దక్షిణాధఃకరక్రమాత్॥10॥
అక్షమాలా చ కమలం
బాణోఽసిః కులిశం గదా।
చక్రం త్రిశూలం పరశుః
శఙ్ఖో ఘణ్టా చ పాశకః॥11॥
శక్తిర్దణ్డశ్చర్మ
చాపం పానపాత్రం కమణ్డలుః।
అలఙ్కృతభుజామేభిరాయుధైః
కమలాసనామ్॥12॥
సర్వదేవమయీమీశాం
మహాలక్ష్మీమిమాం నృప।
పూజయేత్సర్వలోకానాం
స దేవానాం
ప్రభుర్భవేత్॥13॥
గౌరీదేహాత్సముద్భూతా
యా సత్త్వైకగుణాశ్రయా।
సాక్షాత్సరస్వతీ
ప్రోక్తా శుమ్భాసురనిబర్హిణీ॥14॥
దధౌ చాష్టభుజా బాణముసలే శూలచక్రభృత్।
శఙ్ఖం ఘణ్టాం లాఙ్గలం
చ కార్ముకం
వసుధాధిప॥15॥
ఏషా సమ్పూజితా భక్త్యా సర్వజ్ఞత్వం
ప్రయచ్ఛతి।
నిశుమ్భమథినీ దేవీ శుమ్భాసురనిబర్హిణీ॥16॥
ఇత్యుక్తాని స్వరూపాణి మూర్తీనాం తవ
పార్థివ।
ఉపాసనం జగన్మాతుః పృథగాసాం నిశామయ॥17॥
మహాలక్ష్మీర్యదా
పూజ్యా మహాకాలీ సరస్వతీ।
దక్షిణోత్తరయోః
పూజ్యే పృష్ఠతో మిథునత్రయమ్॥18॥
విరఞ్చిః స్వరయా మధ్యే
రుద్రో గౌర్యా చ దక్షిణే।
వామే లక్ష్మ్యా హృషీకేశః పురతో
దేవతాత్రయమ్॥19॥
అష్టాదశభుజా మధ్యే వామే
చాస్యా దశాననా।
దక్షిణేఽష్టభుజా
లక్ష్మీర్మహతీతి సమర్చయేత్॥20॥
అష్టాదశభుజా చైషా యదా
పూజ్యా నరాధిప।
దశాననా చాష్టభుజా దక్షిణోత్తరయోస్తదా॥21॥
కాలమృత్యూ చ సమ్పూజ్యౌ
సర్వారిష్టప్రశాన్తయే।
యదా చాష్టభుజా పూజ్యా శుమ్భాసురనిబర్హిణీ॥22॥
నవాస్యాః శక్తయః పూజ్యాస్తదా
రుద్రవినాయకౌ।
నమో దేవ్యా ఇతి
స్తోత్రైర్మహాలక్ష్మీం సమర్చయేత్॥23॥
అవతారత్రయార్చాయాం
స్తోత్రమన్త్రాస్తదాశ్రయాః।
అష్టాదశభుజా చైషా పూజ్యా
మహిషమర్దినీ॥24॥
మహాలక్ష్మీర్మహాకాలీ
సైవ ప్రోక్తా సరస్వతీ।
ఈశ్వరీ పుణ్యపాపానాం సర్వలోకమహేశ్వరీ॥25॥
మహిషాన్తకరీ యేన పూజితా
స జగత్ప్రభుః।
పూజయేజ్జగతాం ధాత్రీం చణ్డికాం
భక్తవత్సలామ్॥26॥
అర్ఘ్యాదిభిరలఙ్కారైర్గన్ధపుష్పైస్తథాక్షతైః।
ధూపైర్దీపైశ్చ నైవేద్యైర్నానాభక్ష్యసమన్వితైః॥27॥
రుధిరాక్తేన బలినా మాంసేన
సురయా నృప।
(బలిమాంసాదిపూజేయం
విప్రవర్జ్యా మయేరితా॥
తేషాం కిల సురామాంసైర్నోక్తా
పూజా నృప క్వచిత్।)
ప్రణామాచమనీయేన
చన్దనేన సుగన్ధినా॥28॥
సకర్పూరైశ్చ తామ్బూలైర్భక్తిభావసమన్వితైః।
వామభాగేఽగ్రతో దేవ్యాశ్ఛిన్నశీర్షం మహాసురమ్॥29॥
పూజయేన్మహిషం యేన ప్రాప్తం
సాయుజ్యమీశయా।
దక్షిణే పురతః సింహం
సమగ్రం ధర్మమీశ్వరమ్॥30॥
వాహనం పూజయేద్దేవ్యా ధృతం యేన చరాచరమ్।
కుర్యాచ్చ స్తవనం ధీమాంస్తస్యా
ఏకాగ్రమానసః॥31॥
తతః కృతాఞ్జలిర్భూత్వా స్తువీత చరితైరిమైః।
ఏకేన వా మధ్యమేన
నైకేనేతరయోరిహ॥32॥
చరితార్ధం తు న
జపేజ్జపఞ్ఛిద్రమవాప్నుయాత్।
ప్రదక్షిణానమస్కారాన్
కృత్వా మూర్ధ్ని కృతాఞ్జలిః॥33॥
క్షమాపయేజ్జగద్ధాత్రీం
ముహుర్ముహురతన్ద్రితః।
ప్రతిశ్లోకం చ జుహుయాత్పాయసం
తిలసర్పిషా॥34॥
జుహుయాత్స్తోత్రమన్త్రైర్వా
చణ్డికాయై శుభం హవిః।
భూయో నామపదైర్దేవీం పూజయేత్సుసమాహితః॥35॥
ప్రయతః ప్రాఞ్జలిః ప్రహ్వః ప్రణమ్యారోప్య
చాత్మని।
సుచిరం భావయేదీశాం చణ్డికాం తన్మయో
భవేత్॥36॥
ఏవం యః పూజయేద్భక్త్యా
ప్రత్యహం పరమేశ్వరీమ్।
భుక్త్వా భోగాన్ యథాకామం
దేవీసాయుజ్యమాప్నుయాత్॥37॥
యో న పూజయతే
నిత్యం చణ్డికాం భక్తవత్సలామ్।
భస్మీకృత్యాస్య
పుణ్యాని నిర్దహేత్పరమేశ్వరీ॥38॥
తస్మాత్పూజయ భూపాల సర్వలోకమహేశ్వరీమ్।
యథోక్తేన విధానేన చణ్డికాం
సుఖమాప్స్యసి॥39॥
॥ ఇతి వైకృతికం
రహస్యం సమ్పూర్ణమ్ ॥
Comments
Post a Comment