Durga Manasa Puja
॥ శ్రీదుర్గామానస-పూజా ॥
ఉద్యచ్చన్దనకుఙ్కుమారుణపయోధారాభిరాప్లావితాం
నానానర్ఘ్యమణిప్రవాలఘటితాం
దత్తాం గృహాణామ్బికే।
ఆమృష్టాం సురసున్దరీభిరభితో హస్తామ్బుజైర్భక్తితో
మాతః సున్దరి భక్తకల్పలతికే
శ్రీపాదుకామాదరాత్॥1॥
దేవేన్ద్రాదిభిరర్చితం
సురగణైరాదాయ సింహాసనం
చఞ్చత్కాఞ్చనసంచయాభిరచితం
చారుప్రభాభాస్వరమ్।
ఏతచ్చమ్పకకేతకీపరిమలం
తైలం మహానిర్మలం
గన్ధోద్వర్తనమాదరేణ
తరుణీదత్తం గృహాణామ్బికే॥2॥
పశ్చాద్దేవి గృహాణ శమ్భుగృహిణి
శ్రీసున్దరి ప్రాయశో
గన్ధద్రవ్యసమూహనిర్భరతరం
ధాత్రీఫలం నిర్మలమ్।
తత్కేశాన్ పరిశోధ్య కఙ్కతికయా
మన్దాకినీస్రోతసి
స్నాత్వా ప్రోజ్జ్వలగన్ధకం భవతు హే
శ్రీసున్దరి త్వన్ముదే॥3॥
సురాధిపతికామినీకరసరోజనాలీధృతాం
సచన్దనసకుఙ్కుమాగురుభరేణ
విభ్రాజితామ్।
మహాపరిమలోజ్జ్వలాం
సరసశుద్ధకస్తూరికాం
గృహాణ వరదాయిని త్రిపురసున్దరి
శ్రీప్రదే॥4॥
గన్ధర్వామరకిన్నరప్రియతమాసంతానహస్తామ్బుజ-
ప్రస్తారైర్ధ్రియమాణముత్తమతరం
కాశ్మీరజాపిఞ్జరమ్।
మాతర్భాస్వరభానుమణ్డలలసత్కాన్తిప్రదానోజ్జ్వలం
చైతన్నిర్మలమాతనోతు
వసనం శ్రీసున్దరి త్వన్ముదమ్॥5॥
స్వర్ణాకల్పితకుణ్డలే
శ్రుతియుగే హస్తామ్బుజే ముద్రికా
మధ్యే సారసనా నితమ్బఫలకే
మఞ్జీరమఙ్ఘ్రిద్వయే।
హారో వక్షసి కఙ్కణౌ
క్వణరణత్కారౌ కరద్వన్ద్వకే
విన్యస్తం ముకుటం శిరస్యనుదినం
దత్తోన్మదం స్తూయతామ్॥6॥
గ్రీవాయాం ధృతకాన్తికాన్తపటలం గ్రైవేయకం సున్దరం
సిన్దూరం విలసల్లలాటఫలకే సౌన్దర్యముద్రాధరమ్।
రాజత్కజ్జలముజ్జ్వలోత్పలదలశ్రీమోచనే
లోచనే
తద్దివ్యౌషధినిర్మితం
రచయతు శ్రీశామ్భవి శ్రీప్రదే॥7॥
అమన్దతరమన్దరోన్మథితదుగ్ధసిన్ధూద్భవం
నిశాకరకరోపమం త్రిపురసున్దరి శ్రీప్రదే।
గృహాణ ముఖమీక్షతుం ముకురబిమ్బమావిద్రుమై-
ర్వినిర్మితమఘచ్ఛిదే
రతికరామ్బుజస్థాయినమ్॥8॥
కస్తూరీద్రవచన్దనాగురుసుధాధారాభిరాప్లావితం
చఞ్చచ్చమ్పకపాటలాదిసురభిద్రవ్యైః
సుగన్ధీకృతమ్।
దేవస్త్రీగణమస్తకస్థితమహారత్నాదికుమ్భవ్రజై-
రమ్భఃశామ్భవి సంభ్రమేణ విమలం
దత్తం గృహాణామ్బికే॥9॥
కహ్లారోత్పలనాగకేసరసరోజాఖ్యావలీమాలతీ-
మల్లీకైరవకేతకాదికుసుమై
రక్తాశ్వమారాదిభిః।
పుష్పైర్మాల్యభరేణ
వై సురభిణా
నానారసస్రోతసా
తామ్రామ్భోజనివాసినీం
భగవతీం శ్రీచణ్డికాం పూజయే॥10॥
మాంసీగుగ్గులచన్దనాగురురజః
కర్పూరశైలేయజై-
ర్మాధ్వీకైః సహ కుఙ్కుమైః
సురచితైః సర్పిర్భిరామిశ్రితైః।
సౌరభ్యస్థితిమన్దిరే
మణిమయే పాత్రే భవేత్
ప్రీతయే
ధూపోఽయం సురకామినీవిరచితః శ్రీచణ్డికే త్వన్ముదే॥11॥
ఘృతద్రవపరిస్ఫురద్రుచిరరత్నయష్ట్యాన్వితో
మహాతిమిరనాశనః సురనితమ్బినీనిర్మితః।
సువర్ణచషకస్థితః
సఘనసారవర్త్యాన్విత-
స్తవ త్రిపురసున్దరి స్ఫురతి దేవి
దీపో ముదే॥12॥
జాతీసౌరభనిర్భరం
రుచికరం శాల్యోదనం నిర్మలం
యుక్తం హిఙ్గుమరీచజీరసురభిద్రవ్యాన్వితైర్వ్యఞ్జనైః।
పక్వాన్నేన సపాయసేన మధునా
దధ్యాజ్యసమ్మిశ్రితం
నైవేద్యం సురకామినీవిరచితం శ్రీచణ్డికే త్వన్ముదే॥13॥
లవఙ్గకలికోజ్జ్వలం
బహులనాగవల్లీదలం
సజాతిఫలకోమలం సఘనసారపూగీఫలమ్।
సుధామధురిమాకులం
రుచిరరత్నపాత్రస్థితం
గృహాణ ముఖపఙ్కజే స్ఫురితమమ్బ తామ్బూలకమ్॥14॥
శరత్ప్రభవచన్ద్రమః
స్ఫురితచన్ద్రికాసున్దరం
గలత్సురతరఙ్గిణీలలితమౌక్తికాడమ్బరమ్।
గృహాణ నవకాఞ్చనప్రభవదణ్డఖణ్డోజ్జ్వలం
మహాత్రిపురసున్దరి
ప్రకటమాతపత్రం మహత్॥15॥
మాతస్త్వన్ముదమాతనోతు
సుభగస్త్రీభిః సదాఽఽన్దోలితం
శుభ్రం చామరమిన్దుకున్దసదృశం ప్రస్వేదదుఃఖాపహమ్।
సద్యోఽగస్త్యవసిష్ఠనారదశుకవ్యాసాదివాల్మీకిభిః
స్వే చిత్తే క్రియమాణ
ఏవ కురుతాం
శర్మాణి వేదధ్వనిః॥16॥
స్వర్గాఙ్గణే వేణుమృదఙ్గశఙ్ఖభేరీనినాదైరుపగీయమానా।
కోలాహలైరాకలితా
తవాస్తు విద్యాధరీనృత్యకలా సుఖాయ॥17॥
దేవి భక్తిరసభావితవృత్తే ప్రీయతాం యది
కుతోఽపి లభ్యతే।
తత్ర లౌల్యమపి సత్ఫలమేకం
జన్మకోటిభిరపీహ న లభ్యమ్॥18॥
ఏతైః షోడశభిః పద్యైరుపచారోపకల్పితైః।
యః పరాం దేవతాం
స్తౌతి స తేషాం ఫలమాప్నుయాత్॥19॥
॥ ఇతి దుర్గాతన్త్రే
దుర్గామానసపూజా సమాప్తా ॥
Comments
Post a Comment